قدر
الواحدة ظهرا يوم الموافق 20/10/1980 في زاوية الحديقة في بقعة خلف الاشجار ظهرت حفرة صغيرة جدا يهيأ للناظر انها جحر نمل كانت تتسع يوما بعد يوم ولكن احدا لم يلتفت اليها لانها في موقعها هذا مخفية عن الانظار.
الواحدة ظهرا يوم الموافق 20/10/1980 دوي صوت الطفل في منزل رقم 21 آذنا بقدوم المولود الي الحياة
سعدية: بسم الله ماشاء الله بنوتة زي القمر هتسموها ايه يا ستي
حياة : هنسميها رحمة
إبراهيم: ياه يا حياة انت متتصوريش فرحتي قد ايه انا مش مصدق نفسي دي اللحظة اللي كنت مستنيها من 16 سنة هتيها لما اشيلها عارفة يا رحمة انا مش هسيبك ابدا ومش هاخلي حاجة تحصلك وكل اللي نفسك فيه هاعملهولك يالا اكبري بسرعة علشان نلعب سوا ونشتري كل اللي هتتمنيه
ومرت الايام سريعا
رحمة : يا ماما انا بقي عندي 21 سنة وما اعرفش شكل الشارع باتعلم في البيت بالعب في البيت حتى لما باتعب بتجيبو الدكاترة في البيت انا زهقت وحاسة نفسي مش عايشة
حياة : يا بنتي ده بس علشان بنخاف عليكي بابا ما بيستحملش عليكي الهوا
رحمة: يعني كمان ناقص تمنعو عني الهواء علشان اموت وترتاحو
حياة: اخص عليكي يا رحمة ده كلام يتقال برضه انتي عارفة لو بابا سمعك بتقولي كده يروح فيها وبعدين انتي زعلانة ليه مانتي عندك جنينة كبيرة حوالين البيت يجري فيها الخيل
رحمة :ما هي دي ما بقتش عيشة والله في يوم هتصحو هتلاقوني سبتيلكو البيت ومشيت
المنزل غارق في السكون الجميع نيام انه وقت القيلولة ولكن رحمة لم تستطيع النوم اخذت تتقلب في نومها من ثم حزمت امرها
-انا لازم امشي من البيت انا كده مش عايشة اخذت بعض الاغراض وضعتها في شنطة صغيرة وخرجت الي الحديقة في حذر
نظرت الي البوابة وجدت الحارس متيقظ
-اه يا ربي ما فيش امل
دارت في الحديقة علها تجد مخرج واتجهت الي صف من الاشجار في ركن بعيد من الحديقة لم تجد الشجاعة يوما في الذهاب اليه و اقتربت اكثر و..............
ابراهيم : ازاي يعني ما خرجتش من هنا اومال راحت فين دي مالهاش اثر في البيت كله
حارس الامن : والله يا فندم ما عدتش من هنا انا قاعد من الصبح ما اتحركتش
حياة: يا تري انتي فين يا بنتي
الواحدة ظهرا يوم الموافق 20/ 10/ 2001
انغلقت الحفرة بعد ان ادت مهمتها
تعليقات
إرسال تعليق